(छन्द माधवी तथा किरीट - वर्ण 14)
अज अंक अजै पद राजै निशंक, हरे भवशंक निशंकित दाता |
मदमत्त मतंग के माथे गँथे, मतवाले तिन्हें हने ज्यों अरिहाता ||
गजनागपुरै लियो जन्म जिन्हौं, रवि के प्रभु नंदन श्रीमति-माता |
सो कुंथु सुकंथुनि के प्रतिपालक, थापौं तिन्हें जुतभक्ति विख्याता |
ॐ ह्रीं श्रीकुंथुनाथजिनेन्द्र |
अत्र अवतर अवतर संवौषट् |
ॐ ह्रीं श्रीकुंथुनाथजिनेन्द्र |
अत्र तिष्ठ तिष्ठ ठः ठः |
ॐ ह्रीं श्रीकुंथुनाथजिनेन्द्र |
अत्र मम सन्निहितो भव भव वषट् |
अष्टक
चाल - लावनी मरहठी की, लाला
मनसुखरायजी कृत
कुंथु सुन अरज दास केरी,
नाथ सुन अरज दासकेरी |
भवसिन्धु पर्यो हौं नाथ,
निकारो बांह पकर मेरी ||
प्रभु सुन अरज दासकेरी, नाथ
सुन अरज दासकेरी |
जगजाल पर्यो हौं वेगि
निकारो बांह पकर मेरी |टेक|
सुरसरिता को उज्ज्वल जल
भरि, कनकभृंग भेरी |
मिथ्यातृषा निवारन कारन,
धरौं धार नेरी ||कुंथु0
ॐ ह्रीं श्रीकुंथुनाथजिनेन्द्राय
जन्मजरामृत्युविनाशनाय
जलं नि0स्वाहा |1|
बावन चंदन कदलीनंदन,
घसिकर गुन टेरी |
तपत मोह नाशन के कारन, धरौं
चरन नेरी ||कुंथु0
ॐ ह्रीं श्रीकुंथुनाथजिनेन्द्राय
भवातापविनाशनाय चन्दनं नि0स्वाहा |2|
मुक्ताफलसम उज्ज्वल
अक्षत, सहित मलय लेरी |
पुंज धरौं तुम चरनन आगे अखय
सुपद देरी ||कुंथु0
ॐ ह्रीं श्रीकुंथुनाथजिनेन्द्राय
अक्षयपदप्राप्तये अक्षतान् नि0स्वाहा |3|
कमल केतकी बेला दौना,
सुमन सुमनसेरी |
समरशूल निरमूल हेत प्रभु,
भेंट करौं तेरी ||कुंथु0
ॐ ह्रीं श्रीकुंथुनाथजिनेन्द्राय
कामबाणविध्वंसनाय पुष्पं नि0स्वाहा |4|
घेवर बावर मोदन मोदक,
मृदु उत्तम पेरी |
ता सों चरन जजौं करुनानिधि,
हरो छुधा मेरी ||कुंथु0
ॐ ह्रीं श्रीकुंथुनाथजिनेन्द्राय
क्षुधारोगविनाशनाय
नेवैद्यं नि0स्वाहा |5|
कंचन दीपमई वर दीपक,
ललित जोति घेरी |
सो ले चरन जजौं भ्रम तम रवि,
निज सुबोध देरी ||कुंथु0
ॐ ह्रीं श्रीकुंथुनाथजिनेन्द्राय
मोहान्धकार विनाशनाय दीपं नि0स्वाहा |6|
देवदारु हरि अगर तगर करि
चूर अगनि खेरी |
अष्ट करम ततकाल जरे ज्यों,
धूम धनंजेरी ||कुंथु0
ॐ ह्रीं श्रीकुंथुनाथजिनेन्द्राय
अष्टकर्मदहनाय धूपं नि0स्वाहा |7|
लोंग लायची पिस्ता केला,
कमरख शुचि लेरी |
मोक्ष महाफल चाखन कारन,
जजौं सुकरि ढेरी ||कुंथु0
ॐ ह्रीं श्रीकुंथुनाथजिनेन्द्राय
मोक्षफल प्राप्तये फलं नि0स्वाहा |8|
जल चंदन तंदुल प्रसून
चरु, दीप धूप लेरी |
फलजुत जनन करौं मन सुख धरि,
हरो जगत फेरी ||कुंथु0
ॐ ह्रीं श्रीकुंथुनाथजिनेन्द्राय
अनर्घ्यपदप्राप्तये अर्घ्यं नि0स्वाहा |9|
पंच कल्याणक अर्घ्यावली
(छन्द मोतियादाम वर्ण 12)
सुसावन की दशमी कलि जान,
तज्यो सरवारथसिद्ध विमान |
भयो गरभागम मंगल सार, जजें
हम श्री पद अष्ट प्रकार ||
ॐ ह्रीं श्रावणकृष्णादशम्यां
गर्भमंगलमंडिताय
श्रीकुंथु0अर्घ्यं नि0 |1|
महा बैशाख सु एकम शुद्ध,
भयो तब जनम तिज्ञान समृद्ध |
कियो हरि मंगल मंदिर शीस,
जजें हम अत्र तुम्हें
नुतशीश ||
ॐ ह्री वैशाकशुक्लाप्रतिपदायां
जन्ममंगलप्राप्ताय
श्रीकुंथु0अर्घ्यं नि0 |2|
तज्यो षटखंड विभौ
जिनचंद, विमोहित चित्त चितार सुछद |
धरे तप एकम शुद्ध विशाख,
सुमग्न भये निज आनंद चाख ||
ॐ ह्री
वैशाकशुक्लाप्रतिपदायां
तपोमंगलप्राप्ताय श्रीकुंथु0अर्घ्यं नि0 |3|
सुदी तिय चैत सु चेतन
शक्त, चहूं अरि छयकरि तादिन व्यक्त |
भई समवसृत भाखि सुधर्म,
जजौं पद ज्यों पद पाइय पर्म ||
ॐ ह्रीं चैत्रशुक्लातृतीयायां
केवलज्ञानप्राप्ताय श्रीकुंथु0अर्घ्यं नि0 |4|
सुदी वैशाख सु एकम नाम,
लियो तिहि द्यौस अभय
शिवधाम |
जजे हरि हर्षित मंगल गाय,
समर्चतु हौं तुहि मन-वच-काय
||
ॐ ह्री वैशाकशुक्लाप्रतिपदायां
मोक्षमंगलप्राप्ताय श्रीकुंथु0अर्घ्यं नि0 |5|
जयमाला
(अडिल्ल छंद-मात्रा 21 रुपकालंकार)
षट खंडन के शत्रु राजपद में हने |
धरि दीक्षा षटखंडन पाप तिन्हें दने ||
त्यागि सुदरशन चक्र धरम चक्री भये |
करमचक्र चकचूर सिद्ध दिढ़ गढ़ लये |1|
ऐसे कुंथु जिनेश तने पद पद्म को |
गुन अनंत भंडार महा सुख सद्म को ||
पूजौं अरघ चढ़ाय पुरणानंद हो |
चिदानंद अभिनंद इन्द्र-गन-वंद हो |2|
पद्धरि छंद (मात्रा 16)
जय जय जय जय
श्रीकुंथुदेव, तुम ही
ब्रह्मा हरि त्रिंबुकेव |
जय बुद्धि विदाँवर विष्णु
ईश, जय रमाकांत शिवलोक शीश |3|
जय दया धुरंधर सृष्टिपाल,
जय जय जगबंधु सुगनमाल |
सरवारथसिद्धि विमान छार,
उपजे गजपुर में गुन अपार |4|
सुरराज कियो गिर न्हौन जाय,
आंनद-सहित जुत-भगति भाय |
पुनि पिता सौंपि करमुदितअंग, हरितांडव-निरत कियो अभंग |5|
पुनि स्वर्ग गयो तुम इत
दयाल, वय पाय मनोहर प्रजापाल |
षटखंड विभौ भोग्यो समस्त,
फिर त्याग जोग धार्यो निरस्त |6|
तब घाति केवल उपाय, उपदेश
दियो सब हित जिनाय |
जा के जानत भ्रम-तम विलाय,
सम्यक् दर्शन निर्मल लहाय |7|
तुम धन्य देव किरपा-निधान,
अज्ञान-क्षमा-तमहरन भान |
जय स्वच्छ गुनाकर शुक्त
सुक्त, जयस्वच्छ सुखामृत भुक्तिमुक्त |8|
जय भौभयभंजन कृत्यकृत्य,
मैं तुमरो हौं निज भृत्य भृत्य |
प्रभु असरन शरन अधार धार,
मम विघ्न-तूलगिरि जारजार |9|
जय कुनय यामिनी सूर सूर, जय
मन वाँछित सुख पूर पूर |
मम करमबंध दिढ़ चूर चूर,
निजसम आनंद दे भूर भूर |10|
अथवा जब लों शिव लहौं नाहिं,
तब लों ये तो नित ही लहाहिं |
भव भव श्रावक-कुल जनमसार,
भवभव सतमति सतसंग धार |11|
भव भव निजआम-तत्व ज्ञान, भव-भव
तपसंयमशील दान |
भव-भव अनुभव नित चिदानंद,
भव-भव तुमआगम हे जिनंद |12|
भव-भव समाधिजुत मरन सार, भव-भव
व्रत चाहौं अनागार |
यह मो कों हे करुणा निधान,
सब जोग मिले आगम प्रमान |13|
जब लों शिव सम्पति लहौं
नाहिं, तबलों मैं इनको लहाँहि |
यह अरज हिये अवधारि नाथ,
भवसंकट हरि कीजे सनाथ |14|
छन्द घत्तानन्द (मात्रा 31)
जय दीनदयाला, वरगुनमाला,
विरदविशाला सुख आला |
मैं पूजौं ध्यावौं शीश
नमावौं, देहु अचल पद की चाला |15|
ॐ ह्रीं श्रीकुंथुनाथ जिनेन्द्राय
पूर्णार्घ्यं निर्वपामीति स्वाहा |
छंद रोड़क (मात्रा - 24)
कुंथु जिनेसुर पाद पदम जो प्रानी ध्यावें |
अलिसम कर अनुराग, सहज सो
निज निधि पावें ||
जो बांचे सरधहें, करें
अनुमोदन पूजा |
'वृन्दावन' तिंह पुरुष सदृश, सुखिया नहिं दूजा ||
इत्याशीर्वादः (पुष्पांजलिं क्षिपेत्)
|
|
